Paasissutissat pissarsiariuminartut - Aallaqqaasiut
Kikkut tamat oqartussaaqataassappata innuttaasut tamarmik paasissutissanik ajornanngitsumik killilersugaanngitsumillu pissarsisinnaasariaqarput.
Qangaaniilli allakkatigut paasissutissat soorlu allakkat quppersakkallu inunnut isiginiarnermikkut innarluutilinnut pissarsiarineqarsinnaanngitsutut isigineqartarput, kisianni isigiarsuttorpassuarnut paasissutissat allatat qanoq saqqummiunneqarnerat, pissarsiarineqarsinnaanersoq pissarsiarineqarsinnaannginnersorluunniit, pingaarnertut apeqqutaasarpoq.
Elektroniskiusumik paasissutissanik ingerlatitseqqiisarneq, tassunga ilanngullugu internet, tappiitsunut isigiarsuttunullu iluaqutaasorujussuuvoq, tassami paasissutissat amerlanerusut pissarsiarineqarsinnaammata. Kisianni elektroniskiusumik paasissutissat pissarsiarineqarsinnaassappata, taamaalillutillu paasunneqarsinnaallutik atuarneqarsinnaallutillu, isigiarsuttunit ujaasinermut atorneqassappata il.il., piumasaqaatit arlallit paasiuminartut naammassineqartariaqarput.
Ajoraluartumik 2014-imi suli – naalagaaffiit kommunillu ingerlatsivii aamma namminersorlutik inuussutissarsiuteqartut arlallit sullissinernik neqerooruteqartunut sanilliullugit inuiaqatigiinni digitaliseerinerup naajartornerani – paasissutissarpassuit kisissaanngitsutut ittut tappiitsunit isigiarsuttunillu pissarsiarineqarsinnaanngillat. Tamakku assersuutigalugu paasissutissaasarput kommunimeersut; paasissutissat allatat quppersakkat assigiinngitsut atorlugit, allatut pissarsiarineqarsinnaanngitsut, internetikkut atugassiissutigineqartut. Allatut pissarsiarineqarsinnaanngitsut tassa imaapput, paasissutissat elektroniskiusut pisariaqartitsineq malillugu nipinngortinneqarsinnaasut tappiitsunulluunniit naqinninngorlugit attorlugit atuarneqarsinnaasut. Kisianni paasissutissat amerlasuut pissarsiarineqarsinnaalernissaannut aqqut suli takeqaaq.
Paasissutissat inunnit sapinngisamik amerlanerpaanit pissarsiarineqarsinnaanngorlugit tunisassiarineqarnissaasa pilersaarusiorneqartarnissaat pingaaruteqarpoq – sulinermut piffissamullu aamma sipaarutaapput. Aallaqqaammulli atuaruminartunik naqitanik allattaraanni inuit isigiarsuttorpassuit pissarsiarisinnaanngisaannik allanik saqqummersitanik pisariaqartitsissanngikkaluarput. Smartphonesit tabletillu pissarsiuariuminartunik atortulersukkat amerliartortillugit inuit isiginiarnermikkut innarluutillit appsinik amerligaluttuinnartunik atuilersarput, ilaatigut paasissutissanik sukkasuumik pissarsinissaq qulakkeerniarlugu, ilaatigullu paasissutissat paasiuminarninngorlugit pissarsiariuminarninngorlugillu ilisarnartunngortinneqarsinnaasunngorlugit, naak appsit taamatut ittut immikkuualuttortaat atortorissaarutitaallu ikinnerugaluartut.
Aamma inuit isiginiarnermikkut innarluutillit assersuutigalugu tappiitsunut naqinnerit allatulluunniit nipit atorlugit pissarsiarineqarsinnaasunngorlugit atuaruminarsakkanik allagartarsualiornikkut paasissutissat pissarsiarineqarsinnaanerat ajornannginnerulersinneqarsinnaapput.
Paasissutissat elektroniskiusut paasissutissallu assersuutigalugu nittartakkaniittut eqqartorneqaleraangata aallaqqaammulli tamakku pissarsiariuminartuunissaat eqqarsaatigissallugit pingaaruteqartorujussuuvoq, tassami paasissutissanut allanut neqeroorutigineqartunut appakaanniarneq ajornakusoortorujussuusinnaasarmat aamma imaluunniit ajornavissorsinnaasarmat.
Paasissutissat pissarsiarineqarsinnaasut allanngorneq ajortuunnginnissaat malinnaaffigissallugit pingaaruteqarpoq, kisianni inuiaqatigiinni ineriartortitsinernut allanut peqatigitillugit ineriartortinneqartariaqarput. Taamaalillutik paasissutisseeriaatsit allat nutaallu periarfissanik nutaanik pilersitsisut imaluunniit pissarsiariuminassutsinik allanik ajornartorsiulersitsisut takkussuusinnaapput.
Innuttaasut tappiitsut isigiarsuttullu innuttaasutulli allatut ingerlalluassagunik sorpassuartigut assut tatineqartarput. Isigalugit paasissutissat amerligaluttuinnartut isummersorfigisussaavaat tamannalu ilutigalugu programmit atortorissaarutillu immikkut iluarsiissutaasut paasissutissanut aqqutissiuussisuut ilinniartussaavaat.