(Eqqortunik nalunaaqutsersuinerit.) Sanaartukkat avatangiiserisat toqqissisimanartut
Avatangiiserisani sanaartukkat isiginiarnermigut innarluutillip angalasinnaassusianut angerlarsimaffimmilu avataani angalaarsinnaaneranut pingaarutilerujussuupput. Angalasinnaassuseq aamma inuttulli nalinginnaasutut tappissuseqartutulli aalasinnaanerit avatangiisini tamakkulu aaqqissuunneqarnerannik ilisimasaqarluarnissamik piumasaqaatitaqarput. Taamaattumik sanaartukkat avatangiiserisat inunnut isiginiarnermikkut innarluutilinnut angalaffigissallugit toqqissisimanartuunissaat isumannaatsuunissaallu pingaaruteqartorujussuupput.
Sanaartukkat avatangiiserisat toqqissisimanartuunissaannut nalunaaqutsersuinerit atorneqartarput. Eqqortunik nalunaaqutsersuinerit akornutaasinnaasunut navianartuusinnaasunullu mianersoqqussutitut imaluunniit atortup immikkut ittup eqqumaffigineqarnissaanik innersuussinerusarput. Nalunaaqutsersuinerit aamma tappiitsup isigiarsuttulluunniit aqqutikkut eqqortukkoornissaanut sumiissusersiornernut takussutissallu atorneqartarput.
Inunnut tappiitsunut nalunaaqutsersuutit pingaarutilerujussuupput. Nalunaaqutsersuutit atorneqartut ima ersaritsigissapput allaat ajaappissamik qaqortumik, alukkut imaluunniit inussanik attorlugit malugineqarsinnaassallutik.
Inunnut isigiarsuttunut nalunaaqutsersuutit akornanni qalipaatit sakkortuut tamakkulu avatangiisaat aamma qalipaatinik eqqortumik inissitsiterinerit qullilersornerillu pingaarutilerujussuupput.