Ileqqoreqqusat
Ileqqoreqqusaq
Tappiitsut isigiarsuttullu Kalaallit Nunaanni peqatigiiffiannut ISI-mut,
11. december 2013-imeersoq, allanngortinneqartoq 28. maj 2017 aamma 8. juni 2020.
December 2025-mi qallunaatuumiit nutseqqitaq.
§ 1. Peqatigiiffiup taaguutaa najugaqarfialu:
Imm. 1. Peqatigiiffiup taaguutigaa ISI, matumalu kingorna taaneqassalluni [Peqatigiiffik].
Imm. 2. Peqatigiiffik Kommuneqarfik Sermersuumi najugaqarfeqarpoq.
§ 2. Peqatigiiffiup siunertaa:
Imm. 1. Peqatigiiffiup siunertaraa tappiitsut isigiarsuttullu soqutigisaasa aallunnissaat, tassuunakkut qularnaarumallugu inuiaqatigiinni innuttaasunut allanut naligiissitaanissaat aamma nammineq inuunerminnut atugarisaminnullu tunngatillugu nammineq aalajangiinissamut periarfissaqarnissaat.
Imm. 2. Peqatigiiffiup siunertani ima anguniassavaa:
- inooqatigiissutsikkut isumannaallisaanermut, ilinniartitaanermut, suliffeqarnermut aamma kulturikkut sunngiffimmilu inuunermut naleqqiullugu tappiitsut isigiarsuttullu Kalaallit Nunaanni innuttaasut allat naligalugit periarfissaqarnissaasa sulissutiginerisigut – pisariaqarpat immikkut naleqqussakkanik ikiorsiissuteqartitsinikkut
- tappiitsut isigiarsuttullu – innuttaasut allat assigalugit – ilinniartitaanermut, suliffeqarnermut, kulturikkut sunngiffimmilu inuunermut peqataanissamut periarfissaasa qularnaarnerisigut – paasissutissanik paasissutissiinermilu teknologiimik atoruminarsaaneq aqqutigalugu,
- inuiaqatigiit tappiitsunut isigiarsuttunullu tikikkuminartuunissaasa sulissutiginerisigut, assersuutigalugu isumannaatsumik angalasinnaanissamut naleqqiullugu
- tappiitsut isigiarsuttullu akornanni attaveqatigiittarfiliornerit, isummersoqatigiillunilu tapersersoqatigiiffiusussanik,
- siunnersuinermik ilitsersuinermillu neqerooruteqarneq, aamma
- nunat tamalaat akornanni tappiitsunut isigiarsuttunullu sulianut peqataaneq.
§ 3. Ilaasortat:
Imm. 1. Tappiitsut isigiarsuttullu tamarmik, taakkununngalu qanigisaasut Peqatigiiffiullu siunertaanik tapersersuisut Peqatigiiffimmut ilaasortanngorsinnaanermut pisinnaatitaapput. Ilaasortat Kalaallit Nunaanni najugaqavissuussapput.
Imm. 2. Siulersuisut Peqatigiiffimmut ilaasortanngortarneq pillugu erseqqinnerusunik periusissiussapput.
Imm. 3. Ilaasortaq ingerlaannartumik ilaasortaajunnaarsinneqassaaq, ukiumi pineqartumi siulianilu ilaasortaanermut akiliut 1. april akilersimanngikkuniuk. Ilaasortanngoqqittoqarsinnaavoq, taamaattorli aatsaat ukiuni pineqartuni marlunni akiligassat akilerneqareerpata.
Imm. 4.Ilaasortaq Peqatigiiffimmik ajoqusiisumik iliuuseqarpat, siulersuisut ilaasortaajunnaarsissinnaavaat, tak. § 10, imm. 10.
Imm. 5. Peqatigiiffimmi ilaasortat kisimik, Peqatigiiffimmi tatigisatut inissisimaffinnut qinigaasinnaapput.
Imm. 6. Peqatigiiffimmi ilaasortat 15-inik ukioqalernerminniit qinersisinnaatitaapput, qinerneqarsinnaanngortarlutillu nammineq aalajangiisinnaasutut ukioqalernernerminnit.
§ 4. Ilaasortaanermut akiliut:
Peqatigiiffiup siunertaanik ingerlatitsinissamut ilaasortat ukiumoortumik akiliuteqartassapput, ilaasortaanermut akiliutip annertussusissaa nalinginnaasumik ataatsimeersuarnermi aalajangerneqartassaaq.
§ 5. Naatsorsuutit aamma kukkunersiuineq:
Imm.1. Ukioq naatsorsuuseriffik tassaavoq qaammatisiutit ukiuat.
Imm. 2. Naatsorsuutit kukkunersiukkat, ukiup tullianut missingersuutinik ilaqartut, nalinginnaasumik ataatsimeersuarnissaq kingusinnerpaamik ullunik 14-inik sioqqullugu ilaasortanut nassiunneqassapput.
Imm. 3. Peqatigiiffiup aningaasaatai aningaaserivimmiitinneqassapput.
§ 6. Ataatsimeersuarneq:
Imm. 1. Ataatsimeersuarneq, Peqatigiiffimmi qullersaalluni oqartussaasoq,ukiut tamaasa ingerlanneqartassaaq. Ataatsimeersuarnissamut aggersaasoqartassaaq, ataatsimeersuarnissaq minnerpaamik ullunik 14-inik sioqqullugu ilaasortanut allakkatigut nalunaaruteqarnikkut. Ullormut oqaluuserisassat aggersaanermut ilaatinneqassapput.
Imm. 2. Ataatsimeersuarnermi oqaluuserisassatut siunnersuutit oqallisigitikkumasat, ataatsimeersuarfissaq ullunik arfineq-marlunnik sioqqullugu peqatigiiffiup siulittaasuanit tiguneqarsimassapput.
§ 7. Ullormi oqaluuserisassat:
Ataatsimeersuarnermi ullormi oqaluuserisassat immikkoortunik ukunannga imaqassapput:
1. Ataatsimiinnermi aqutsisussamik toqqaaneq.
2. Siulersuisut nalunaarutaat.
3. Ukiup siuliani naatsorsuutit akuersissutigineqartussatut saqqummiunneqarnerat.
4. Siunnersuutit tiguneqartut oqaluuserineqarnerat.
5. Ilaasortaanermut akiliutip aalajangerneqarnera.
6. Siulittaasumik, siulersuisunut ilaasortassanik allanik sinniisussanillu qinersineq.
7. Naatsorsuutinik kukkunersiuisussamik sinniisussamillu qinersineq.
8. Tamalaat.
§ 8. Qinersisinnaatitaaneq aamma qinersineq:
Imm. 1. Ataatsimeersuarnermi qinersisinnaatitaapput ilaasortat namminneerlutik, oqarasuaatikkut digitalimilluunniit peqataasut, ukiumoortumillu ilaasortaanermut akiliummik akiliisimasut.
Imm. 2. Ileqqoreqqusat allanngortinnissaannik imaluunniit peqatigiiffiup atorunnaarsinneqarnissaanik siunnersuutit taasissutiginissaat eqqaassanngikkaanni, ilaasortat nalinginnaasumik amerlanerussuteqarneq naapertorlugu aalajangiisassapput.
Imm. 3. Ileqqoreqqusat allanngortinnissaannik siunnersuutit taamaallaat akuersissutigineqarsinnaapput, ilaasortat najuuttut 2/3-mik amerlanerussuteqarnerisigut.
Imm. 4. Peqatigiiffiup atorunnaarsinnaqarnissaanik imaluunniit siunertap allanngortinnissaanik siunnersuutit taamaallaat akuersissutigineqarsinnaapput, tamanna siunertaralugu immikkut ittumik ataatsimeersuarnissamut aggersaasoqareerneratigut, tak. § 11.
Imm. 5. Taasinerit nappaanikkut pisassapput, kisianni ataatsimeersuarnermi aqutsisup imaluunniit ilaasortap ataatsip piumasarippagu taasinerit allakkatigut pisassapput.
§ 9. Immikkut ittumik ataatsimeersuarneq:
Imm. 1. Immikkut ittumik ataatsimeersuartoqartassaaq, tamanna siulersuisuni amerlanerussuteqartut imaluunniit ilaasortat minnerpaamik 1/3-iisa tamanna piumasarippassuk. Immikkut ittumik ataatsimeersuartoqarnissaanik piumasaqaat ullormi oqaluuserisassanik sukumiisumik erseqqissakkamik ilaqartinneqassaaq.
Imm. 2. Immikkut ittumik ataatsimeersuariaqqusisoqassaaq, piumasaqaatip saqqummiunneqarneraniit kingusinnerpaamik ullut 14-it qaanngiunneranni, nalinginnaasumillu ataatsimeersuariaqqusinertut piffissaliilluni aggersaasoqassalluni.
§ 10. Siulersuisut aqutsinerat:
Imm. 1. Peqatigiiffiup ulluinnarni aqunneqarnera siulersuisunit minnerpaamik pingasunik annerpaamillu tallimanik ilaasortaqartumit isumagineqassaaq. Siulersuisuni amerlanerussuteqartut, siulittaasoq ilanngullugu, tappiitsuussapput imaluunniit isigiarsuttuullutik. Siulersuisut katitigaasariaqarput, Peqatigiiffiup Kalaallit Nunaannut tamarmut atuuttuunera ersersillugu.
Imm.2. Siulersuisut tamarmiullutik akisussaaffigaat,
- Peqatigiiffiup sulineranut tunngaviusumik tunaartarisassat aalajangersarnissaat aamma Peqatigiiffiup tamarmiusumik ingerlatsinerata ataqatigiissarnissaa,
- Peqatigiiffiup ilaasortaasa kommunini periarfissaqarluarnerunissaasa sulissutiginissaat,
- tappiitsunut isigiarsuttunullu attaveqatigiiffinnik pilersitsillunilu ataavartitsinissaq,
- Peqatigiiffik sinnerlugu saqqummertarnissaq, tamatumunnga ilanngullugu pisortat susassaqarfiinut,
- Peqatigiiffiup ilisimaneqarlualernissaata ilaasortallu amerlanerulernissaasa sulissutiginissaat, assersuutigalugu ataatsimiisitsinerit pikkorissaanerillu aqqutigalugit,
- Peqatigiiffiup suliaanik ilaasortat ilisimatittarnissaat,
- ilaasortanit ataatsiakkaanit siunnersuutit suliarinissaat aamma
- aningaasat Peqatigiiffiup sulineranut atugassanngortitaajunnartut aqutarinissaat.
Imm. 3. Siulersuisut ukiuni marlunni atuuttussatut qinerneqartassapput, siulersuisuni amerlanerit ikinnerillu paarlakaattumik qinerneqartassallutik. Qinigassanngorteqqittoqarsinnaavoq.
Imm. 4. Sinniisissat marluk ukiut tamaasa qinerneqartassapput, piffissap qinigaaffiup iluani siulersuisunut ilaasortap siulersuisunut ilaasortaajunnaarnerani ivertinneqartartussanik.
Imm. 5. Siunnersuutigineqartoq qinigaasinnaassaguni nammineerluni, oqarasuaatikkut digitalimilluunniit najuuttariaqarpoq, imaluunniit siunnersuutigineqartup qinigassanngortinnissaminut akuersinini allakkatigut uppernarsartariaqarlugu.
Imm. 6. Siulittaasoq ataatsimeersuarnermi qinigaasassaaq. Siulersuisut akunnerminni namminneq inissitsitissapput, siulittaasup tullianik, aningaaserisumik allatsimillu toqqaassallutik.
Imm. 7. Siulersuisut ataatsimeersuarnermut akisussaasuupput.
Imm. 8. Aalajangiinerit nalinginnaasumik amerlanerussuteqarnikkut aalajangiunneqartassapput, taasinermi naligiittoqartillugu siliulittaasup taasinera aalajangiisuussaaq.
Imm. 9. Siulersuisut siulittaasup imaluunniit siulersuisunut ilaasortat marluk ataatsimiinnissaq pisariaqartutut isigippassuk ataatsimiittassapput ullunillu arfineq-marlunnik sioqqutsilluni ataatsimiigiaqqusisoqartassalluni.
Imm. 10. Siulersuisut ilaasortamik ilaasortaajunnaarsitsinissamut pisinnaatitaapput, tamanna immikkut ittumik pissutissaqartutut isumaqarfigigunikku, kisianni ilaasortap pineqartup suliap ataatsimeersuarnermi siullermi saqqummiunnissaa pisinnaatitaaffigivaa.
§ 11. Peqatigiiffimmik atorunnaarsitsineq / siunertaq pillugu aalajangersakkamik allanngortitsineq:
Imm. 1. Peqatigiiffiup atorunnaarsinneqarnissaanik imaluunniit siunertap allanngortinnissaanik siunnersuutit taamaallaat akuersissutigineqarsinnaapput, tamanna siunertaralugu immikkut ittumik ataatsimeersuarnissamut aggersaasoqareerneratigut, ilaasortat minnerpaamik 2/3-ii peqataassapput, ilaasortallu taasisinnaatitaasut najuuttut minnerpaamik 5/6-iisa siunnersuut ilalerlugu akuersissutigisariaqarlugu.
Imm. 2. Ilaasortat naammattut peqataanngippata, ataatsimeersuarnissamut nutaamut aggersaasoqassaaq, tassanilu amerlanerussuteqarluarnikkut aalajangiisoqarsinnaavoq, peqataasut qassiunerat apeqqutaatinnagu.
Imm. 3. Peqatigiiffik atorunnaarsinneqassappat pigisai nalillit/sinneqartoorutai Nunatsinni Inuit Innarluutillit Kattuffiannut tunniunneqassapput.
§ 12. Sinniisutut atsiorsinnaatitaanermut malittarisassat
Imm. 1. Peqatigiiffik sinnerlugu atsiortuusassapput siulittaasoq siulersuisunut ilaasortamik allamik ilaqarluni imaluunniit siulittaasup peqannginnerani siulittaasup tullia siulersuisunut ilaasortamik allamik ilaqarluni.
Imm. 2. Peqatigiffik taamaallaat illumik pisisinnaavoq tunisisinnaalluniluunniit siulersuisut tamarmiusut akuersereernerisigut.
Imm. 3. Siulersuisut allanik pisinnaatitsinermik nalunaaruteqarsinnaapput.
ooOoo
Pileqqaarneranit ileqqoreqqusat akuersissutigineqarput aallarnisarluni ataatsimeersuarnermi 11/12 2013 allanngortinneqarlutillu 28/5 2017-imi aamma 8/6 2020-mi nalinginnaasumik ataatsimeersuarnerni.
December 2025-mi qallunaatuumiit nutseqqitaq.