Tappissutsit paarilluaruk
Tappigerneq aamma suut tamaasa aallaqqaataaniit ilinniarneqartariaqalernerat inuunermi alianartorujussuuvoq allanngornerujussuullunilu. Kisianni tamatigut tappigernernik kinguneqartariaqanngilaq.
Tappissutsivit allanngornerat malugigukku nalunaarutit assigiinngitsut pissusilersornikkullu allannguutit eqqumaffiginerisigut isikkut nappaatit paasineqarsinnaapput katsorsarneqarlutillu, taamaalillutit atorsinnaasumik sinneruttumik tappissuseqarniassagavit.
Tullinnguuttuni ataaseq arlallilluunniit misigigukkit tamanna tappissutsikkut ajornartorsiuteqarnermik pissuteqarsinnaavoq:
- Nakkarluni ajutoornerit
- Aviisimi allannerit tv-milu allagartat atuaruminaapput
- Inuit aqqusinermi ilisariuminaapput
- Aqqusinermi sumiissusersioruminaappoq
- Pigisat amerlanertigut takunngitsoorlugit naaffigisarpaat
- Unnukkut taarsereertillugu anneernissaq nuanninngilaq
- Inuit allat nereqatigalugit nuanninngilaq
- Qalipaatit sakkukitsut assigiinngissutaallu immikkoortikkuminaapput
- Isigisaq ersernerluppoq iserialluniluunniit
- Isikkut annianerit / iluaalliornerit imaluunniit ini qaamalluartillugu taamatut ittarnerit
- Niaqqerisaleraluttuinnarneq isillu avaqqullugit assoroornerit
- Isit aappillerlutik iluaallutillu
Illit inulluunniit qanigisat matuma qulaani taamatut malussartarussi tappissusersi isit nakorsaannut isarualiortumulluunniit misissortittariaqarpasi.
Tappissutsit allanngorpat inunnik allanik / qanigisannik oqaloqateqarnissannut nalornissanngilatit - imaassinnaavoq taakku pigisanut apukulanerulersutit imaluunniit sumiiffinni aatsaat tikitanni sumiissusersioruminaatitsisutit malugereersimagaat.
Oqaatigineqareersutut assersuutigalugu querteqarnerit aamma masattumik AMD-eqarnerit arlallit katsorsarneqarsinnaapput, taamaalilluni ilungersunartumik isiginiarnikkut innarluteqalinngitsoorluni, taamaattoqassappalli nappaatit malunnaataat siusissukkut paasineqartariaqarput. Taamaattumik tappissutsikkut annikitsunnguamilluunniit allanngortoqaraangat kikkut tamaasa iliuuseqaqqullugit kaammattorpavut.
Tappigertut ilagilissappatsit atugassarititaasut nutaat atorlugit aalanertalimmik inuujuarnissat pillugu ISI-mi siunnersuinissamut ilisimasanillu ikiuunnissamut piareersimasoqarpoq.
Danmarkimi Dansk Blindesamfund ukiumut arlaleriarluni tappigeqqaanik pikkorissartitsisarpoq, tamakkunani pikkorissaqataasut ulluinnarni aqutsisinnaaqqilernissaq toqqissisimaqqilernissarlu ilinniartarpaat. Kalaallit Nunaanni kommunini pikkorissarnernut tamakkununnga siumoortumik nalilersuisoqartarnissaa imaluunniit kommunini nammineerluni taamatut pikkorissartitsisoqartarnissaa ISI-mi sulissutigineqarpoq.