Isiginnaassutsit paarilluaruk
Isikkut nappaaterpassuit piffissaagallartillugu paasineqarneq ajorput tamakkulu amerlanerigut ilungersunartumik isiginiarnikkut innarluuteqalernermik kinguneqartarput.
Tappigerneq sunillu tamanik aallaqqaataaniit pinngitsaalisaalluni ilinniaqqinnerit inuunermi aliasunnerujussuarmik allanngornerujussuarmillu kinguneqartarput. Kisianni imaanngilaq tappigertoqartariaqartoq.
Nalunaarutit pissusilersuutikkullu allanngornerit eqqumaffigigaanni minnerunngitsumilli tappissutsit allanngorsimasoq malugigukku issarualiortumukaruit nakorsamukaruilluunniit isikkut nappaaterpassuit paasineqarsinnaapput katsorsarneqarsinnaallutillu, taava atorsinnaasamik sinneruttumik tappissuseqaannassaatit.
Tullinnguuttuni pisumi pisuniluunniit isiginiarnikkut ajornartorsiuteqarnerit pissutaat:
- Nakkarluni ajutoornerit
- Aviisit TV-milu allagartat atuaruminaapput
- Aqqusinermi inuit ilisariuminaapput
- Aqqusinermi sumiissusioruminaappoq
- Pigisat naaffigisarpatit takunngitsoorlugilluunniit
- Unnukkut taarsereersoq silami angalaarneq nuannerneq ajorpoq
- Allanik nereqateqarneq nuannerneq ajorpoq
- Qalipaatit sakkukitsut immikkoortikkuminaapput
- Isigisaq ersernerluttut iseriattorluunniit
- Seqinnertillugu iniluunniit qaammarissarluarsimappat isikkut anniarnerit/iluaalliornerit
- Niaqqerisaleraluttuinnarneq isillu avaqqullugit sukangasoornerit
- Isit aappaluttut iluaatsullu
Illit nammineq inulluunniit qanigisat matuma qulaani sunniummik arlalinnilluunniit misigaqaruit/pat tappissutsit/sersi isit nakorsaannut isarualiortumulluunniit misissortittariaqarpatit/si.
Tappissutsivit allanngornera pillugu inunnik allanik/qanigisannik oqaloqatiginninnissannut nalorninak - immaqa taakku aamma akulikinnerusumik arlaannut aportartutit imaluunniit sumiiffinni aatsaat tikitanni sumiissusiornerit ajornartorsiutigigit malugereersimavaat.
Oqaatigineqareersutut isikkut nappaaterpassuit katsorsarneqarsinnaapput, assersuutigalugu querteqarneq aamma masattumik AMD, taamaalilluni ilungersunartumik isiginiarnikkut innarluuteqalinngitsoorluni, kisianni nappaat piffissaagallartillugu paasineqartariaqarpoq. Taamaattumik inuit tamaasa isiginiarnikkut annikikkaluartumilluunniit allanngortoortut iliuuseqarnissaannik kaammattorpavut.
Tappigertut ilagippatsit siunnersuinernik ilisimasanillu ikiuunnissamut ISI-mi piareersimapput, taamaalillutit nutaanik atugassaqartitaallutit aalalluarlutit inuuinnarsinnaaniassagavit.
Tappigeqqaanik ukiumoortumik pikkorissartitsisarpugut, tamakkunanilu pikkorissartut ulluinnarni aqutsineq pigeqqilersimavaat toqqissisimalersimallutillu.