Inunnut innarluutilinnut inatsit malillugu tapiiffigineqartarneq
Kommunep isumagissavaa pisariaqartumik tapiiffigineqarnissat, isumagissallugulu tapiissutinik pisariaqartitanik pigisaqarnissaq. Imaassinnaavoq tapiissut isigiarsuttup allap atorfissaqartitaanut sanilliullugu illit atorfissaqartitannik allaanerusoq. Tamattami assigiinngitsuuvugut assigiinngitsunillu pisariaqartitsisarluta, inuunitsinnilu sumut killissimanersugut sumiinnersuguluunniit. Ilai ilinniagaqartuusarput, ilai suli meeqqerivimmiittarput, allallu immaqa utoqqalinerup nassatarissaanik innarluuteqalersimallutik. Taamaattumik inuit ataasiakkaarlugit ikiorsiiniarnermi aalajangiisussap naliliiffigisartussaavai.
Pingaarnertut “Inatsisartut inunnut innarluutilinnut inatsisaat” atorneqartarpoq.Taannalu uani inuit innarluutilllit inatsisaattut taagorneqassaaq. Inatsit suliarineqarnikuuvoq sapinngisamik FN-ip inunnut innarluutilinnut isumaqatigiissutiliaa maleqqissaarniarlugu. Inunnut innarluutilinnut isumaqatigiissut naalagaaffiit arlallit isumaqatigiissutaattut oqaatigineqarsinnaavoq, tassani naalagaaffiit nunallu atsioqatigiissimapput isumaqatigiissutip imarisaata malinneqarnissaata sulissutiginissaa maleqqissaarniarlugu. Allanilli aamma inatsiseqarpoq nalunaaruteqarlunilu inunnut innaluutilinnut inatsimmi atuuttuusunik. Assersuutigalugu ilinniagaqarnermut, inunnut ikiorsiissutinut, isumaginninnermi sullissinermi- pisortani sulissinermi atuuttuusunik inatsiseqarluni. NIIK -ip quppersagaani inatsisit atuuttuusut ajornanngitsumik paasiuminarsarlugit katersorneqarnikuupput. NIIK – Nunatsinni inuit innarluutillit Kattuffiat Kalaallit Nunaanni inuit innarluutillit peqatigiiffiisa kattuffigivaat. Tappiitsunut isigiarsuttunullu peqatigiiffik ISI aamma NIIK-mi ilaasortaavoq.
Inunnut innarluutilinnut inatsimmi massakkut atuuttuusumi innarluuteqarneq ersarissarneqarpoq inuiaqatigiinni akimmiffiusartut nassatarisaannik inuttaasup sulisinnaanerata annikillinerata nassatarisaanik. Imatut nassuiarneqarsinnaavoq: Sulisinnaaanerup annikillinera + akimmiffiit assigivaa innarluuteqarneq. Imaanngilaq illit isigiarsuttoq imaluunniit tappiitsoq innarluutiliusoq. Inuiaqatigiilli akornutigisitsisaat ilungersunartitsisuuvoq /unammillernatitsisuuvoq imaluunniit innarluuteqartitsisuuvoq. Tamakku innaarluuteqartitsisutut paasinarsarneqarsinnaapput.
Ilusilersuisoq Ivalu Risager.
Assersuutigalugu ullumikkut oqariaasq innarlutilik atorneqartanngilaq. Taamatut oqariaaseq inunnut aalajangersimasunut ilisarnaatitut pilersitsisarmat. Tassami inuunani anniaataasutut nappaataasutulluunniit isigineqassammat. Qujanartumik inoqatit pillugit taamatut oqaatiginneriaaseq qimanneqarsimavoq. Oqartalerpugummi inuit innarluutillit. Niujarsimagaluarlunga suli uangaavunga. Niuujartuunngilanga.